sadiyon tumhari yaad men sham.en jala.enge
pal bhar ke ba.ad phir bhi tumhen bhuul ja.enge
ta.amir mudda.a talab-e-zauq ho ga.i
buniyad-e-dard hogi to divar uTha.enge
ab kahish-e-junun ka koi silsila nahin
haan be-dili se dast-e-dua bhi uTha.enge
ai karvan-e-tez-qadam mandgan ko dekh
ankhon men kya ghubar-e-sar-e-rah saja.enge
likkhenge qahqahon se bas ik dastan-e-dil
us par hadis-e-dard ka unvan jama.enge
yunhi sahi jo garmi-e-bazar ham se hai
ham bech kar zamir-e-nazar muskura.enge
ya chak-e-dil ko chak-e-gareban bana saken
ya duḳhtaran-misr se daman bacha.enge
kya raḳhsh-e-umr hila-e-marg-ashna nahin
uTThegi mauj-e-reg-e-ravan Duub ja.enge
harf-ashna na hogi koi mauj-e-dard-e-dil
siine pe rakh ke haath magar baiTh ja.enge
Leave a Reply