Sab Ko Hi Us Dar Par Tala Dikhta Tha

sab ko hī us dar par taalā dikhtā thā

mujh ko koī dauḌ ke aatā dikhtā thā

karte the vo duā.eñ andhe hone kī

pyāsoñ ko zindāñ se dariyā dikhtā thā

vo thā ek kanīz ke kamre kā darpan

us meñ dekhne vaalā rotā dikhtā thā

maiñ ne un āñkhoñ meñ duniyā dekhī thī

aur duniyā ko jaane kyā kyā dikhtā thā

uḌtā thā jī bhar ke saverā hote hī

ik panchhī ko ḳhvāb meñ piñjrā dikhtā thā

lauTī thī vo ek vaDere ke ghar se

us ko har jhūle meñ phandā dikhtā thā

kuchh ko dariyā buuñd ke jaisā thā ‘yāsir’

kuchh ko bas ik buuñd meñ dariyā dikhtā thā

Leave a Comment