Aag Apne Hi Daman Ki Zara Pahle Bujha Lo

Waheed Akhtar

aag apne hi daman ki zara pahle bujha lo

fursat ho to phir ham ko bhi jalne se bacha lo

ai qismat-e-farda ke ḳhush-a.ind ḳhayalo

raten na sahi din hi mire aa ke ujalo

patthar ke sanam bhi kabhi kuchh bol sake hain

ai but-shikan az.han ke ḳhamosh savalo

tum men to mira ahu-e-ḳhush-gam nahin hai

ai vadi-e-taḳh.ill ke gum-gashta ghazalo

miTti hui tasvir men kya rang bharoge

miTna tha jinhen miT ga.e tum ḳhud ko sambhalo

ik dard ki daulat tumhen ham saunp chale hain

ab us ko luTa do ki hayat apni bana lo

bad-e-sahari phuul khila aa.i chaman men

kuchh tum bhi lahu apne shahidon ka uchhalo

in rahon men vo naqsh-e-kaf-e-pa to nahin hai

kyuun phuuT ke ro.e ho yahan paanv ke chhalo

chehre pe thakan balon men gard ankhon men surḳhi

lamba hai safar paanv ke kanTe to nikalo

phir sa.at-e-didar ‘vahid’ aa.e na aa.e

tasvir bana kar unhen ankhon men chhupa lo