in lafzon men khud ko dhundungi main bhi
apni ana ka manzar dekhungi main bhi
koi mire baare men na kuchh bhi jaan sake
ab aisa lahja apnaungi main bhi
ankhon se chun kar sab tute-phute khvab
patthar ki khvahish ban jaungi main bhi
main khud apni soch ki mujrim thahri huun
ab ye adalat khud hi jhelungi main bhi
kis kis rang men ilhamat utarte hain
kis kis ki rudaden likkhungi main bhi
tasviron ke maddham rang batate hain
apne ko pahchan na paungi main bhi
dukh men ‘humaira’ apni hifazat karne ko
pichhle sabhi aaseb bulaungi main bhi
Leave a Reply