Kahin Tha Main Mujhe Hona Kahin Tha

kahīñ thā maiñ mujhe honā kahīñ thā

maiñ dariyā thā magar sahrā-nashīñ thā

shikast-o-reḳht kaisī fat.h kaisī

ki jab koī muqābil hī nahīñ thā

mile the ham to mausam hañs diye the

jahāñ jo bhī milā ḳhandāñ-jabīñ thā

saverā thā shab-e-tīra ke aage

jahāñ dīvār thī rasta vahīñ thā

milī manzil kise kār-e-vafā meñ

magar ye rāsta kitnā hasīñ thā

jilau meñ tishnagī āñkhoñ meñ sāhil

kahīñ siine meñ sahrā jā-guzīñ thā

Leave a Comment