Fasih Akmal
dekhiye halat ke jogi ka kab TuuTe sharap
shayad ab is ahd men us se na ho mera milap
sahib-e-imroz afsurda-mizaj o mushta.il
gardish-e-halat ko paimana-e-farda se naap
saya-e-afkar men kanTe sahi chhanv to ho
zehn ki aghosh se bahar nikalna ab hai paap
dil se zauq-e-jurm-e-mehnat kah raha hai baar baar
atish-e-ehsas ke sho.alon se bhi kuchh der taap
a.ine ke samne aate hue Darte hain kyuun
a.ina-sazon ka unvan-e-tamanna jab hain aap
apni sanson ko jala de apne dil ko toḌ de
vaqt ke masruf sadhu ke labon par hai ye jaap
Leave a Reply