ham na hote kaḳh-e-musht-e-ḳhak hota ghaliban
be-sama.at naghma-e-laulak hota ghaliban
aap ne achchha kiya tathir-e-ḳhvahish hi na ki
varna zamzam chashma-e-napak hota ghaliban
atish-e-karb-o-bala ne hosh ke naḳhun liye
josh men sail-e-ḳhas-o-ḳhashak hota ghaliban
ḳhud hi batil-saz ne hangama-ara.i na ki
ḳhush-libas-e-haq bhi daman-chak hota ghaliban
hadson ke ḳhauf se ehsas ki had men na tha
varna nafs-e-mutma.in saffak hota ghaliban
soch kar hi to lagaya hajib-e-shams-o-qamar
la-makan par qabza-e-idrak hota ghaliban
sho.alagi ne is ko ‘rahi’ sad-shikasta kar diya
aa.ina dil surat-e-zahhak hota ghaliban
Leave a Reply