aap ki mujh pe jab bhi navazish hui
mujh pe sang-e-malamat ki barish hui
zindagi bhar rahegi mujhe yaad vo
ishq men jo miri azma.ish hui
mera bachpan mujhe yaad aane laga
titliyon ki jahan bhi numa.ish hui
mere daman pe kichaḌ uchhalta nahin
kya ḳhabar kya raqibon men sazish hui
jhuuT to jhuuT tha jhuuT hi vo raha
barha sach banane ki koshish hui
zulf bikhra.e vo baam par aa ga.e
jab suhani ruton ki sifarish hui
kitna bad-zauq shahr-e-ghazal hai ‘zafar’
bahre gunge ki har su sata.ish hui
Leave a Reply