Shahid Jameel
mohabbat hai magar dhoka nahin hai
ye is sayyare ka qissa nahin hai
kahin dariya kahin sahra nahin hai
har ik raste men ik rasta nahin hai
use main kyon pukare ja raha huun
vahi to hai jo kuchh sunta nahin hai
jise chahe jahan pahuncha ke rakh de
muqaddar par koi pahra nahin hai
yahan hain sainkaḌon hamnam mere
magar koi mire jaisa nahin hai
jo ham tak aa raha hai tere ghar se
yahi ik rasta sidha nahin hai
dalilon ke sahare jiine vaale
tiri divangi men kya nahin hai
Leave a Reply