aane vaali sadi ke lagte hain
pankh ujle pari ke lagte hain
ba.ad muddat ke shahr ki chhat par
kuchh sitare ḳhushi ke lagte hain
Duubi kashti ke tairte chappu
hausle zindagi ke lagte hain
haath ḳhuni kisi darinde ke
paanv to aadmi ke lagte hain
koi chehra bhi chhu nahin paate
aks sab aarsi ke lagte hain
yuun utarti hain dil men vo nazren
bol se ḳhamushi ke lagte hain
haath pe haath dhar ke baiThi shaam
rang ye bebasi ke lagte hain
Leave a Reply