Waqt Ke Rangin Gul-Daste Ko Yaad Aaega ThanDa Hath

vaqt ke rañgīñ gul-daste ko yaad aa.egā ThanDā haath

jab bikhreñge vo gesū to mar jā.egā ThanDā haath

bhīgī palkeñ soch kī uljhan dāman thāme pūchh rahī haiñ

kab tak tār-e-garebāñ yaaro suljhā.egā ThanDā haath

sāz-e-taġhazzul chheḌne vaalo ai afsāne likhne vaalo

aaj lakīroñ kī tafsīreñ dohrā.egā ThanDā haath

garm lahū kī būñdeñ bo.eñ tanhā.ī kī miTTī Dāleñ

patjhaḌ aa.e un shāḳhoñ par ug aa.egā ThanDā haath

patthar patthar jot jalegī sāhil sāhil sho.ale hoñge

bhīgī bhīgī sard havā meñ sharmā.egā ThanDā haath

baaġh ke maalī mere ġhunche ġhairoñ ne pāmāl kiye

phir bhī terī phulvārī ko mahkā.egā ThanDā haath

Leave a Comment