kya karvan-e-hasti guzra rava-ravi men
farda ko main ne dekha gard-o-ghubar-e-di men
the mahv lala-o-gul kis kaif-e-be-ḳhudi men
zaḳhm-e-jigar ke Tanke TuuTe hansi hansi men
yaran-e-bazm-e-ishrat DhunDun kahan main tum ko
taron ki chhanv men ya pichhle ki chandni men
har uqda men jahan ke poshida hai kashakash
hai mauj-e-ḳhanda-e-gul pinhan kali kali men
zaḳhmon men ḳhud chamak hai aur us pe ye sitam hai
rang-e-paridan se main rahta huun chandni men
ham kis shumar men the pursish jo ham se hoti
ye imtiyaz paaya ashob-e-agahi men
hukm-e-qaza ho jaisa sarzad ho fe.al vaisa
banda ka daḳhl bhi hai phir is kahi badi men
raftar-e-saya ko hai past-o-buland yaksan
Thokar kabhi na khaa.e rah-e-farotani men
vajd aa gaya falak ko ghash aa gaya zamin ko
do tarah ke asar the ik saut-e-sarmadi men
ta.abir us ki shayad ek vapsin nafas ho
jo ḳhvab dekhte the ham saari zindagi men
laa.i hubab tak ko sail-e-fana baha kar
ik aah khinchne ko ik dam ki zindagi men
mahshar ki afaton ka dhaḌka nahin raha ab
sau hashr main ne dekhe do din ki zindagi men
pahlu men tu ho ai dil phir hasraten hazaron
kis baat ki kami hai teri salamti men
pursan-e-hal vo ho aur samne bula kar
kya janiye zaban se kya nikle be-ḳhudi men
tu ek zill-e-hasti phir kaisi ḳhud-parasti
saaya ki parvarish hai daman-e-be-ḳhudi men
haa.el bas ik nafas hai mahshar men aur ham men
parda habab ka hai farda men aur di men
ankhen dikha rahi hai din se mujhe shab-e-gham
asar tirgi ke hain din ki raushni men
tu ne to apne dar se mujh ko uTha diya hai
parchha.in phir rahi hai meri usi gali men
sajda ka hukm mujh ko tu ne to ab diya hai
pahle hi likh chuka huun main ḳhatt-e-bandgi men
ai ‘nazm’ chheḌ kar ham tujh ko hue pasheman
kya jante the zalim ro dega dil-lagi men
Leave a Reply