badlega ruḳh hava kabhi to
khul ja.ega rasta kabhi to
ghaflat pe ḳhud apni chaunk uThega
sun kar vo miri sada kabhi to
ho ja.ega munkashif bhi ḳhud par
dekhega vo aa.ina kabhi to
kab tak ye ada-e-be-niyazi
TuTega ye silsila kabhi to
kholega vo mujh pe bab-e-rahmat
sun lega miri dua kabhi to
qaa.em hai umiid par hi duniya
hal hoga ye mas.ala kabhi to
kar dega zamin ka bojh halka
uThega gira hua kabhi to
baiTha huun main us ke raste par
ho ja.ega samna kabhi to
di hai dard-e-dil pe us ke dastak
tai hoga ye fasla kabhi to
Leave a Reply