jo gul hai yaan so us gul-e-rukhsar saath hai
kya gul hai vo ki jis ke ye gulzar saath hai
to mast shab andheri aur aghyar saath hai
jo dil men aave kah ye gunahgar saath hai
khamosh andalib-e-chaman tujh se kiya hai bahs
apna sukhan to murgh-e-giraftar saath hai
paigham us nigah ka ki jis men hai bu-e-mehr
kya jaane kis ke akhiri didar saath hai
uqda na ye khula ki mire dil sa pahlavan
tujh zulf ke bandha hua ik taar saath hai
karte to ho mire maraz-e-dil ka tum ilaaj
yaaro jo dil yahi hai to azar saath hai
‘sauda’ ke haath kyun-ke lage vo mata-e-husn
le niklen jis ko ghar se to bazar saath hai