na zikr-e-ashna ne qissa-e-begana rakhte hain
hadis-e-yar rakhte hain yahi afsana rakhte hain
chaman men sarv-qad gar jalva-e-mastana rakhte hain
ba-rang-e-tauq-e-qumri ham khat-e-paimana rakhte hain
khayal ankhon ka teri jabki ai janana rakhte hain
to juun nargis har ik angusht bar paimana rakhte hain
numayan zulf ke halqe men kar tuk khal-e-ariz ko
ki hain sayyad jitne daam men vo daana rakhte hain
ba-juz-aina mashuqon ki kab ho zulf-pardazi
ki aks-e-panja-e-mizhgan se dast-e-shana rakhte hain
bajae halqa-e-kakul hain khal-e-ru-e-said-afgan
ba-chashm-e-dam ja-e-mardumuk yaan daana rakhte hain
bisan-e-chob-o-naqqara hain khaar o abla-pai
ba-vadi-e-junun-angez naubat-khana rakhte hain
nahin ashk-e-musalsal ye gareban-gir ai saaqi
gale men apne ashiq subha-e-sad-dana rakhte hain
sada-e-ashnai misl-e-hamdam ho so vo jaane
ki misl-e-bansuri angusht-bar har khana rakhte hain
na uljho is qadar be-vajh suljhane men zulfon ke
dil-e-sad-chak to ham bhi ba-rang-e-shana rakhte hain
dil apna kyuun na ho bahr-e-jahan men juun guhar kaala
talash-e-ab hai ham ko na fikr-e-dana rakhte hain
na kyunkar bazm men raushan ho apni shab ye dil-sozi
ki ulfat shama-ru se ham bhi juun parvana rakhte hain
bahar aai hai ab to ai junun ho silsila jumban
ki ham muddat se qasd-e-raftan-e-virana rakhte hain
nigah tuk abru-o-chashm-e-butan par kijiyo zahid
ki ye mehrab-e-masjid ke tale mai-khana rakhte hain
bithaen sarv-o-shamshad apne sar par kyuun na qumri ko
tire qad ke hain bande vaz-e-azadana rakhte hain
thikana kuchh na puchho ham se tum khana-ba-doshon ka
jahan juun bu-e-gul thahre vahin kashana rakhte hain
hamen mat chhed kar dekho rulao aur jalao tum
ki tufan chashm men siine men atiash-khana rakhte hain
karenge baiat-e-dast-e-subu pir-e-mughan tujh se
ki shauq-e-sharb-e-mai hai mashrab-e-rindana rakhte hain
‘nasir’ ab ham ko kya hai qissa-e-kaunain se matlab
ki chashm-e-pur-fusun-e-yar ka afsana rakhte hain
‘nasir’ us shokh se kahna ki pesh-e-chashm-e-hairat men
tasavvur roz-o-shab tera ham ai janana rakhte hain
Leave a Reply