be-khudi hai hasraton ki bhiid chhat jaane ke baad
aap hi gum ho gae ham rasta paane ke baad
main huun vo shoala bhadakta hai jo bujh jaane ke baad
main huun aisa phuul khilta hai jo murjhane ke baad
mil gae ham khaak men parde ke uth jaane ke baad
kuchh nazar aane se pahle kuchh nazar aane ke baad
kis tarah jalve ko dekha dekh kar kya ho gaya
dekhne valon ko dekho jalva dikhlane ke baad
maut hai jis ki saza ye zindagi hai vo gunah
in balaon se milega amn mar jaane ke baad
yuun to parde hi men rahti hai tumhen sab ki khabar
kaash dekho parde se bahar nikal aane ke baad
dekh kar mayus dil ko dekhta huun su-e-arsh
la-makan hi sujhta hai aise virane ke baad
chhod kar tauf-e-haram hai kya pashemani mujhe
gardish-e-qismat men apne aap aa jaane ke baad
un ke rauze se mujhe kyuun le chali hai su-e-khuld
ai ajal kyuun kar jiyunga us ke chhut jaane ke baad
kya ho idrak-e-tajalli se vo be-khud kamyab
jaan se jaana hon jis ko hosh men aane ke baad
haae ye apni javani aur ye bakht-e-siyah
ye andheri kothari phir raat ho jaane ke baad
tu ne ai saaqi kiya andaza-e-masti ghalat
yuun hi deta ja mujhe paimana paimane ke baad
marg par amada teri sard-mehri ne kiya
niind mujh ko aa gai thandi hava khane ke baad
jazb-e-ulfat hi se paida hoti hai shakl-e-kashish
varna kyuun jazb-e-nazar ho kuchh nazar aane ke baad
apne jalve ke karishme ye mira zauq-e-nigah
tum zara dekho miri ankhon men phir jaane ke baad
vo ata-e-avval-e-saqi bhi ‘raghib’ khuub thi
ham ne lakhon khum chadhae ek paimane ke baad
Leave a Reply