Tahzeeb Hafi
chiḳhte hain dar-o-divar nahin hota main
aankh khulne pe bhi bedar nahin hota main
ḳhvab karna ho safar karna ho ya rona ho
mujh men ḳhubi hai bezar nahin hota men
ab bhala apne liye banna sanvarna kaisa
ḳhud se milna ho to tayyar nahin hota main
kaun aa.ega bhala meri ayadat ke liye
bas isi ḳhauf se bimar nahin hota main
manzil-e-ishq pe nikla to kaha raste ne
har kisi ke liye hamvar nahin hota main
teri tasvir se taskin nahin hoti mujhe
teri avaz se sarshar nahin hota main
log kahte hain main barish ki tarah huun ‘hafi’
aksar auqat lagatar nahin hota main
Leave a Reply