Dilbar Ye Wo Hai Jis Ne Dil Ko Dagha Diya Hai

dilbar ye vo hai jis ne dil ko dagha diya hai

ai chashm dekh tujh ko main ne sujha diya hai

tegh-e-sitam se mera jo khun-baha diya hai

qatil ne mere dil ka ye khun-baha diya hai

naqsh qadam gali ka teri bana diya hai

kyuun kar uthun ki dil ne mujh ko bitha diya hai

ai chashm gar ye za hai rone ko tere zahmat

ro ro ke abr ko bhi tu ne rula diya hai

sar-rishta-e-vafa se kya shama-ru hain vaqif

ham ne patang un se milna uda diya hai

dil de ke jaan ka muft ik rog hi kharida

daulat se teri main ne ye kuchh liya diya hai

jaate nazar jidhar hi ik nuur jalva-gar hai

mukhde se aaj parda kisi ne utha diya hai

tu paan kha ke hansna ik sahal sa hai samjha

ye barq vo hai jis ne aalam jala diya hai

kyuun ham se ho bigadte ham ne to shaikh sahab

holi se peshtar hi tum ko bana diya hai

kyuun kar na mere dil ka shisha ho tukde tukde

nazron se is ko zalim tu ne gira diya hai

paanv se kya jagaya tu ne hi mujh ko goya

thokar se bakht-e-khufta mera jaga diya hai

kya janun ishq kya hai lekin kisi ne ‘ehsan’

ik aag ka sa shoala dil ko laga diya hai

Leave a Comment