Prem Bhandari
basti men qatl-e-am ki koshish na ban saka
main qatilon ke zehn ki sazish na ban saka
koi kami na us men thi shayad isi liye
vo shaḳhs mere vaste ḳhvahish na ban saka
main ruk nahin saka to miri bebasi thi ye
badal tha us ke sahn men barish na ban saka
jis par tamam-umr bahut naaz tha mujhe
mera vo ilm meri sifarish na ban saka
kya baat thi vo dil men mire umr-bhar raha
jo shaḳhs mere ghar ki numa.ish na ban saka
Leave a Reply