Aurang Zeb
rang to maujud ki tasvir ho sakte nahin
vo jo manzar ḳhvab hain ta.abir ho sakte nahin
kyuun mujhe ash.ar kahne ka hunar us ne diya
mujh se mere dukh agar tahrir ho sakte nahin
aankh men manzar to aa sakte hain surat oḌh kar
aa.ine to aks se zanjir ho sakte nahin
main hi apne dard-o-gham likkhunga apne haath se
ye janaze aap se tahrir ho sakte nahin
sarf ho ja.enge ham us ki mohabbat men yunhi
sarf ho ja.enge ham tasḳhir ho sakte nahin
is zamin ki Toh men rahna himaqat hai miyan
jis zamin pe sher bhi ta.amir ho sakte nahin
guftugu ye kah rahi hai baat men halke ho tum
so muridi men raho tum piir ho sakte nahin
niind to be-kar men in kosnon ki zad men hai
ḳhvab hi aise hain jo ta.abir ho sakte nahin
is ko sehl-e-mumtana.a men baat aa.egi samajh
‘zeb’ aise sher to tafsir ho sakte nahin
Leave a Reply