agar ham na the gham uthane ke qabil
to kyuun hote duniya men aane ke qabil
karun chaak siina to sau baar lekin
nahin daagh dil ye dikhane ke qabil
milen tum se kyunkar rahe hi nahin ham
bulane ke qabil na aane ke qabil
chhute bhi qafas se to kis kaam ke hain
nahin jab chaman tak bhi jaane ke qabil
ba-juz us ke the khaak pahle bhi ai charkh
na the khaak men phir milane ke qabil
kiya tark-e-duniya main jab to ye samjhe
ki duniya nahin dil lagane ke qabil
vo aae dam-e-naza kya kah saken
nahin hont tak bhi hilane ke qabil
khudaya ye ranj aur ye na-suburi
na the ham to is azmane ke qabil
rahe ham na kuchh mustafa-khan ke gham men
na fikr-e-sukhan ne padhane ke qabil
na chhodenge mahbub-e-ilahi ke dar ko
nahin go ham is astane ke qabil
hamen qaid karne se kya nafa sayyad
na the daam men ham to laane ke qabil
na baal munaqqash na par-ha-e-rangin
na avaz-e-khush ke sunane ke qabil
hue hain vo na-qqabilon men shumar ab
jinhen mante the zamane ke qabil
vo ‘azurda’ jo khush-bayan the nahin ab
ishare se bhi kuchh batane ke qabil
Leave a Reply