Husn Walon Ka Sar-E-Sahil Nazara Hai Ki Nain

Qamar Aasi

husn valon ka sar-e-sahil nazara hai ki na.iin

Dubne vaale ko tinke ka sahara hai ki na.iin

jab ki ham donon ne bang-e-dil pe amanna kaha

haal hai ab jo hamara vo tumhara hai ki na.iin

fa.ede se mujh ko zyada fikr hai nuqsan ki

muḳhlisi ke kaam men koi ḳhasara hai ki na.iin

meri sehat ho ga.i behtar tumhare ishq men

tum ko bhi kar-e-mohabbat ne sanvara hai ki na.iin

un ko dekha dekhte hi ham shanavar ho ga.e

bahr-e-ulfat ka ḳhuda jaane kinara hai ki na.iin

ye jabin ruḳhsar ankhen lab hamare hain magar

ye batao dil tumhara bhi hamara hai ki na.iin