ai dost purane pahchane
ham kitni muddat baad mile
aur kitni sadiyon baad mili
ye ek nigah-e-mehr-o-sakha
jo apni sakha se khud pur-nam
baitho to zara
batlao to kya
ye sach hai mere taaqub men
phirta hai hujum-e-sang-zanan?
kya niil bahut hain chehre par?
kya kasa-e-sar hai khuun se tar?
paivand-e-qaba dushnam bahut
paivast-e-jigar ilzam bahut
ye nazr-e-karam kyuun hai pur-nam?
jab nikle ku-e-malamat men
ik ghaugha to ham ne bhi suna
tiflan ki to kuchh taqsir na thi
ham aap hi the yuun khud-rafta
madhoshi ne mohlat hi na di
ham mud ke nazara kar lete
bachne ki to surat khair na thi
darman ka hi chara kar lete
pal bhar bhi hamare kar-e-junun
ghaflat jo gavara kar lete
Leave a Reply