apne virane ka nuqsan nahin chahta main
ya.ani ab dusra insan nahin chahta main
kaT ga.i jaisi bhi kaTni thi yahan dhuup ke saath
ab kisi saa.e ka ehsan nahin chahta main
mar raha huun main yahan aur vo kahta hai mujhe
na-mukammal tira iman nahin chahta main
paas aa kar na baḌha aur pareshani-e-dil
phir kisi ishq ka saman nahin chahta main
tu mohabbat men yunhi jaan ganva baiThega
ja chala ja ki tiri jaan nahin chahta main
chahta huun ki yahan phuul khile hon har-su
ya.ani ye jang ka maidan nahin chahta main
main jo chup huun to use aap ghanimat janen
dekhiye shahr men tufan nahin chahta main
Leave a Reply