suuli chaḌhe jo yaar ke qad par fida na ho
phansi chaḌhe jo qaidi-e-zulf-e-rasa na ho
mazmun vo kya jo lazzat-e-gham se bhara na ho
sha.er vo kya kalam men jis ke maza na ho
bad-nam mere vaste vo dilruba na ho
ya-rab adu ke haath se meri qaza na ho
jab apni koi baat baghair-az-dua na ho
dushman ke kahne sunne se nadan ḳhafa na ho
ho vo agar ḳhilaf-e-muafiq hava na ho
Duube vo naav jis ka ḳhuda naḳhuda na ho
dil-dadgi ko husn-e-ḳhuda-dad kam nahin
naseh agar nahin hai buton men vafa na ho
roz-e-jaza vo shoḳh mile ham ko ai ḳhuda
is ke siva kuchh aur adu ki saza na ho
mushkil ka samna ho to himmat na hariye
himmat hai shart sahib-e-himmat se kya na ho
but azaran-e-vaqt bana.en agar hazar
tera nazir ek bhi naam ḳhuda na ho
dhoke men mere qatl kya us ne ghair ko
qatil ka kya qusur jo meri qaza na ho
sach hai ki har kamal ko duniya men hai zaval
aisa baḌa hai kaun jo aḳhir ghaTa na ho
roz-e-jaza se va.iz-e-nadan use Dara
sadma shab-e-firaq ka jis ne saha na ho
milta nahin pata tire chhalle ke chor ka
ai gul-badan ye shoḳhi-e-duzd-e-hina na ho
tera gila na ghair ka shikva zaban pe hai
karta huun arz hal-e-sitamgar ḳhafa na ho
paate hain kaj-sarisht jaza apne fe.al ki
kahti hai rasti ki bure ka bhala na ho
bulbul na phuul ḳhanda-e-sub.h-e-bahar par
nadan kahin ye ḳhanda-e-dandan-numa na ho
teri zaban pe aa.e agar harf-e-iltiyam
kyuun kar shikast-e-dil ke liye momya na ho
ghafil mariz-e-ishq ki tu ne ḳhabar na li
tha ghair us ka haal vo ab tak ho ya na ho
sharminda ai karim na hon ashiqon men ham
pursish hamare qatl ki roz-e-jaza na ho
karta hai ai ‘asar’ dil-e-ḳhun-gashta ka gila
ashiq vo kya ki ḳhasta-e-tegh-e-jafa na ho
Leave a Reply