sub.h tak ham raat ka zad-e-safar ho ja.enge
tujh se ham-aghosh ho kar muntashar ho ja.enge
dhuup sahra tan barhana ḳhvahishen yadon ke khet
shaam aate hi ghubar-e-rah-guzar ho ja.enge
dasht-e-tanha.i men jiine ka saliqa sikhiye
ye shikasta bam-o-dar bhi ham-safar ho ja.enge
shorish-e-duniya ko ahista-ravi ka hukm ho
nazr-e-ḳhair-o-shar tire shorida-sar ho ja.enge
ye jo hain do-char shurafa-e-avadh aḳhtar-shanas
kuchh dinon men ye bhi auraq-e-digar ho ja.enge
Leave a Reply