Abdurrahman Wasif
guman tod chuka main magar nahin koi hai
sara-e-fikr men baitha hua kahin koi hai
mire khayal ko deta hai nau-ba-nau chehre
hai aas paas koi lams-e-marmarin koi hai
mira yaqin ki duniya men huun akela main
sada-e-dil mujhe kahti hai gham-nashin koi hai
tiri tabahi men shamil nahin hai ghair koi
use talash to kar mar-e-astin koi hai
nigah se nahin jaata koi khayal-numa
havas-o-hosh-o-khirad ke bahut qarin koi hai
mira tumhara taalluq bigad ke ban gaya hai
mire tumhare khayalat ka amiin koi hai
vara-e-zehn-o-zaman kis ne kaenat buni
tu kaise kahta hai koi nahin nahin koi hai
Leave a Reply