Poet
hai nigahban ruḳh ka ḳhal-ru-e-dost
hafiz-e-qur.an hua hindu-e-dost
ham na hon patthar ho ham pahlu-e-dost
a.ina luuTe bahar-e-ru-e-dost
phir ga.i jab nargis-e-jadu-e-dost
sab musalman ho ga.e hindu-e-dost
bha ga.i hai dil ko aisi ḳhu-e-dost
aati hai har gul se mujh ko bu-e-dost
hai ḳhayal-e-ariz-o-gesu-e-dost
gah musalman huun kabhi hindu-e-dost
sau bala.en aa ga.iin ushshaq par
jab kamar tak aa ga.e gesu-e-dost
haDDiyan meri na khana ai huma
daant rakhte hain sagan-e-ku-e-dost
aag bhaḌke kyuun na pahlu men mire
ghair hain vaan aaj ham pahlu-e-dost
asl ye hai naql-e-mehrab-e-haram
sajda vajib hai tah-e-abru-e-dost
tegh-e-abru par kaTe lakhon gale
ban gaya ganj-e-shahidan ku-e-dost
dil hua maftun nigah-e-yar ka
sher-afgan hain magar ahu-e-dost
ba.ad-e-murdan qabr men aThon pahar
aa.ega mujh ko ḳhayal-e-ru-e-dost
phir raha hai aaj putli ki tarah
meri ankhon men qad-e-dil-ju-e-dost
hai ḳhayal-e-ḳhal-e-mushkin raat din
dil ko mere jaan lo mushku-e-dost
ab vahi sar hai ki Takrata huun main
vasl men ye tha sar-e-zanu-e-dost
kya koi aafat abhi baaqi hai aur
le chala hai dil mujhe phir su-e-dost
le uḌi be-saḳhta dil ko mire
aa ga.i jis dam hava-e-ku-e-dost
rang-e-ulfat se miTa zang-e-dui
ho ga.i hai mujh men paida bu-e-dost
ghairat-e-mansur huun main ai ‘habib’
har ghaḌi huun sarf-e-ha-o-hu-e-dost
Leave a Reply