adu-e-bad-guman ki dastan kuchh aur kahti hai
magar teri nigah-e-ḳhush-bayan kuchh aur kahti hai
ḳhizan ke dam se apni ḳhush-dili ka hai bharam varna
bahar aate hi yad-e-ashiyan kuchh aur kahti hai
suno dil se to phir har naghma-e-ishrat ke parde men
alam ki dastan-e-ḳhun-chakan kuchh aur kahti hai
nazar un ki zaban un ki ta.ajjub hai ki is par bhi
nazar kuchh aur kahti hai zaban kuchh aur kahti hai
hazar andaz se ahl-e-havas ab daam phaila.en
nava-e-ta.ir-e-arsh ashiyan kuchh aur kahti hai
tire lutf-o-karam ka mo’tarif hai ik jahan lekin
kisi majbur-e-gham ki dastan kuchh aur kahti hai
ḳhusha teri nazar ka imtiyaz-e-jalvat-o-ḳhalvat
vahan kuchh aur kahti thi yahan kuchh aur kahti hai
gulistan men bahar-e-gul-fashan aane se kya hasil
ki mustaqbil ki tasvir-e-ḳhizan kuchh aur kahti hai
vo mere haal par ‘sahir’ kabhi jo muskurate hain
to dil se apni sa.i-e-ra.egan kuchh aur kahti hai
Leave a Reply