shab-e-siyāh hai naddī ke paas baiThe haiñ
kisī kī yaad meñ tanhā udaas baiThe haiñ
guzar rahe haiñ manāzir nazar ke aage se
sabhī se chhupte hue bad-havās baiThe haiñ
jage sitāroñ kī mahfil ujaḌne vaalī hai
idhar pahan ke añdhere libās baiThe haiñ
hamāre ba.ad use kaun hai jo suntā ho
fareb khā ke bhī ham us ke paas baiThe haiñ
yahī maqām thā āḳhir meñ ishq vāloñ kā
ġhamoñ se duur kahīñ ġham-shanās baiThe haiñ