akbar-hyderabadi

Badan Se Rishta-e-Jaan Motabar Na Tha Mera

badan se rishta-e-jan mo’tabar na tha mera

main jis men rahta tha shayad vo ghar na tha mera

qarib hi se vo guzra magar ḳhabar na hui

dil is tarah to kabhi be-ḳhabar na tha mera

main misl-e-sabza-e-begana jis chaman men raha

vahan ke gul na the mere samar na tha mera

na raushni na hararat hi de saka mujh ko

parai aag men koi sharar na tha mera

zamin ko ru-kash-e-aflak kar diya jis ne

hunar tha kis ka agar vo hunar na tha mera

kuchh aur tha miri tashkil o irtiqa ka sabab

madar sirf havaon pe gar na tha mera

jo dhuup de gaya mujh ko vo mera suraj tha

jo chhanv de na saka vo shajar na tha mera

nahin ki mujh se mire dil ne bevafai ki

lahu se rabt hi kuchh mo’tabar na tha mera

pahunch ke jo sar-e-manzil bichhaḌ gaya mujh se

vo ham-safar tha magar ham-nazar na tha mera

ik aane vaale ka main muntazir to tha ‘akbar’

har aane vaala magar muntazir na tha mera

More Poems

Leave a Comment