na tanha nastarin o nastaran se ishq hai mujh ko
fida-kar-e-chaman huun kul chaman se ishq hai mujh ko
usi ki god men palti rahi hai zindagi meri
muqaddas vadi-e-gang-o-jaman se ishq hai mujh ko
mohabbat hai azal ke din se shamil meri fitrat men
bila tafriq shaiḳh o barhaman se ishq hai mujh ko
agar chehre hon afsurda to jiine ka maza kya hai
urus-e-zindagi ke bankpan se ishq hai mujh ko
samajhta huun use bhi ek manzil rah-e-himmat ki
purana halqa-e-dar-o-rasan se ishq hai mujh ko
Leave a Reply