Rang Us Mahfil-E-Tamkin Mein Jamaya Na Gaya

rañg us mahfil-e-tamkīñ meñ jamāyā na gayā

ḳhāmushī se bhī mirā haal sunāyā na gayā

vahshat-e-dil ne hijābāt-e-jahāñ chaak kiye

ek parda ruḳh-e-jānāñ se uThāyā na gayā

ishq ik daaġh sahī dāman-e-hastī pe magar

ḳhud mashiyyat se bhī ye daaġh miTāyā na gayā

kar diyā daftar-e-hastī to pareshāñ dal ne

magar ik ḳhvāb-e-pareshāñ ko bhulāyā na gayā

vo añdherā thā ki hañgām-e-sahar bhī ham se

sham-e-andoh-e-judā.ī ko bujhāyā na gayā

sarhad-e-ishq se aage na baḌhī vahshat-e-ishq

husn-e-hushyār ko dīvāna banāyā na gayā

laakh unvāñ se bhulānā unheñ chāhā thā ‘ravish’

kisī unvāñ se magar un ko bhulāyā na gayā

Leave a Comment