Dukh Tamasha to Nahin Hai Ki Dikhaen Baba

dukh tamasha to nahin hai ki dikha.en baaba

ro chuke aur na ab ham ko rula.en baaba

kaisi dahshat hai ki ḳhvahish se bhi Dar lagta hai

munjamid ho ga.i honTon pe dua.en baaba

maut hai narm-dili ke liye badnam un men

hain yahan aur bhi kuchh aisi bala.en baaba

daagh dikhla.en ham un ko to ye miT ja.enge kya

gham-gusaron se kaho yuun na sata.en baaba

ham-safiran-e-chaman yaad to karte honge

par qafas tak nahin atin vo sada.en baaba

patte shaḳhon se baraste rahe ashkon ki tarah

raat bhar chalti rahin tez hava.en baaba

aag jangal men bhaḌakti hai ‘ziya’ shahr men baat

kaise bhaḌke hue sho.alon ko bujha.en baaba