sham.a ki nazron men sauda.i hai parvana abhi
soz-o-saz-e-ishq se hai husn begana abhi
astan-e-naz se duniya hai begana abhi
koi ka.aba DhunDta hai koi but-ḳhana abhi
kuchh bagulon aur kuchh zarron men hain sargoshiyan
dasht se guzra hai shayad koi divana abhi
us ne jazb-e-ishq ki tasir dekhi hi nahin
apne jalvon par hai nazan husn-e-janana abhi
kya hui teri nigah-e-mast ki sarmastiyan
hosh men baiTha hua hai tera divana abhi
tere zauq-e-did men rang-e-kalimana nahin
varna vo ḳhud chal ke aa.e be-hijabana abhi
aql-e-nadan ke tasarruf men hain lakhon gulistan
ishq ki qismat men ai ‘sabir’ hai virana abhi
Leave a Reply