nutq palkon pe sharar ho to ghazal hoti hai
astin aag se tar ho to ghazal hoti hai
hijr men jhuum ke vijdan pe aata hai nikhar
raat suuli pe basar ho to ghazal hoti hai
koi dariya men agar kachche ghaḌe par taire
saath saath is ke bhanvar ho to ghazal hoti hai
muddat-e-umr hai matlub riyazat ke liye
zindagi bar-e-digar ho to ghazal hoti hai
lazmi hai ki rahen zer-e-nazar ghaib o huzur
donon aalam ki ḳhabar ho to ghazal hoti hai
qaab qausain ki arman-e-payambar ki qasam
husn chilman ke udhar ho to ghazal hoti hai
haath lagte hain falak hi se mazamin ‘afzal’
dil men jibril ka par ho to ghazal hoti hai
Leave a Reply