Dafatan Dil Mein Kisi Yaad Ne Li Angdai

dafatan dil men kisi yaad ne li angdai

is kharabe men ye divar kahan se aai

aaj khulne hi ko tha dard-e-mohabbat ka bharam

vo to kahiye ki achanak hi tiri yaad aai

bas yuun hi dil ko tavaqqo si hai tujh se varna

janta huun ki muqaddar hai mira tanhai

nashsha-e-talkhi-e-ayyam utarta hi nahin

teri nazron ne gulabi to bahut chhalkai

yuun to har shakhs akela hai bhari duniya men

phir bhi har dil ke muqaddar men nahin tanhai

Dubte chand pe roi hain hazaron ankhen

main to roya bhi nahin tum ko hansi kyuun aai

raat bhar jagte rahte ho bhala kyuun ‘nasir’

tum ne ye daulat-e-bedar kahan se paai

Leave a Comment