afroz-rizvi

Jitne Hain Rang-e-Chaman Rang-e-Hina Ho Jaenge

jitne hain rang-e-chaman rang-e-hina ho jaenge

tum hamen dekhoge aur ham aaina ho jaenge

khaak odhenge phirenge ku-ba-ku aur us ke baad

ham tiri furqat men jaane kya se kya ho jaenge

naqsh ban kar paniyon men Dubte hain jis tarah

dekhna is tarah ik din ham fana ho jaenge

maut ki andhi chalegi aur phir mere charagh

dekhte hi dekhte nazr-e-hava ho jaenge

apni khushbuen utarne do hamare jism men

phuul ki surat khilenge ham saba ho jaenge

vasl ki shab jagmagaegi dil aflak par

chand aur suraj tumhare naqsh-e-pa ho jaenge

dekh lena tuut kar shakh-e-shajar se ek din

khushk patte andhiyon ke ham-nava ho jaenge

ek din ‘afroz’ jitne bhi hain ahang-e-hayat

gumbad-e-jan men vo sab hi be-sada ho jaenge

More Poems

Leave a Comment