Sufi
intishar-o-khauf har ik sar men hai
afiyat se kaun apne ghar men hai
zindagi par sab haqiqat khul chuki
tu abhi tak khvab ke paikar men hai
mutmain insan kahin par bhi nahin
ek si halat zamane bhar men hai
raat ki chattan se sub.hen tarash
khvab ki taabir isi patthar men hai
jhuut ki ban aai hai charon taraf
sach agar hai bhi to pas-manzar men hai
barf ehsasat ki pighla sake
vo sharar maazi ki khakistar men hai
tuut jaane tak udenge ham ‘niyaz’
hausla itna to bal-o-par men hai
Leave a Reply