Tariq Qamar
sard paḌ jaa.e ḳhuun paani na ho
meri tahzib zafrani na ho
ungliyan aap ki lahu mera
kaise tahrir javedani na ho
ḳhatm karna ho ik ta.alluq bhi
aur divar bhi uThani na ho
kah rahi hain vo ḳhush-suḳhan ankhen
ab koi baat bhi zabani na ho
jis tarah tum ne iḳhtitam kiya
ḳhatm aise koi kahani na ho
nafraton ka ilaaj mumkin hai
gar ye bimari ḳhandani na ho
ham kabhi dil kabhi nazar men rahen
la-makani ho be-makani na ho
vo juda ho ke hai malul bahut
ye kahin teri ḳhush-gumani na ho
Leave a Reply