Sard paD Jae KHun Pani Na Ho

sard paḌ jaa.e ḳhuun paanī na ho

merī tahzīb zāfrānī na ho

uñgliyāñ aap kī lahū merā

kaise tahrīr jāvedānī na ho

ḳhatm karnā ho ik ta.alluq bhī

aur dīvār bhī uThānī na ho

kah rahī haiñ vo ḳhush-suḳhan āñkheñ

ab koī baat bhī zabānī na ho

jis tarah tum ne iḳhtitām kiyā

ḳhatm aise koī kahānī na ho

nafratoñ kā ilaaj mumkin hai

gar ye bīmārī ḳhāndānī na ho

ham kabhī dil kabhī nazar meñ raheñ

lā-makānī ho be-makānī na ho

vo judā ho ke hai malūl bahut

ye kahīñ terī ḳhush-gumānī na ho

Leave a Comment