Akhtar Shirani
mujhe apni pasti ki sharm hai tiri rifaton ka khayal hai
magar apne dil ko main kya karun use phir bhi shauq-e-visal hai
is ada se kaun ye jalva-gar sar-e-bazm-e-husn-e-khayal hai
jo nafas hai mast-e-bahar hai jo nazar hai gharq-e-jamal hai
unhen zid hai arz-e-visal se mujhe shauq-e-arz-e-visal hai
vahi ab bhi un ka javab hai vahi ab bhi mera saval hai
tiri yaad men hua jab se gum tire gum-shuda ka ye haal hai
ki na duur hai na qarib hai na firaq hai na visal hai
tiri bazm-e-khalvat-e-la-makan tira astan mah-o-kahkashan
magar ai sitara-e-arzu mujhe arzu-e-visal hai
main vatan men rah ke bhi be-vatan ki nahin hai ek bhi ham-sukhan
hai koi sharik-e-gham-o-mehan to vo ik nasim-e-shumal hai
main bataun vaiz-e-khush-nava hai jahan-o-khuld men farq kya
ye agar fareb-e-khayal hai vo fareb-e-husn-e-khayal hai
yahi dad-e-qissa-e-gham mili ki nazar uthi na zaban mili
faqat ik tabassum-e-sharmagi miri be-kasi ka maaal hai
vo khushi nahin hai vo dil nahin magar un ka saaya sa ham-nashin
faqat ek gham-zada yaad hai faqat ik fasurda khayal hai
kahin kis se ‘akhtar’-e-be-nava hamen bazm-e-dahr se kya mila
vahi ek saghar-e-zahr-e-gham jo harif-e-nosh-e-kamal hai
Leave a Reply