jis din se rabta mira dilbar se kaT gaya
rishta nadi ka jaise samundar se kaT gaya
ham log aa ke bas ga.e hain jab se shahr men
aḳhlaq gaanv vaala vo ghar ghar se kaT gaya
har koi aaj gharq hai apni hi zaat men
yuun rafta rafta aadmi bahar se kaT gaya
mumkin hai roz-e-hashr shahidon men ho shumar
apna gala to pyaar ke ḳhanjar se kaT gaya
nadim hain ‘nazr’ ham to taraqqi men shahr ki
buḌhiya ka jhonpaḌa kahin manzar se kaT gaya
Leave a Reply