Naseer Ahmad Nasir
chhajje hain sa.eban hain aage baḌhe hue
galiyon ke sab makan hain aage baḌhe hue
pasmandgi avaam ke pichhe paḌi hui
do-char ḳhandan hain aage baḌhe hue
rasta to ruk gaya hai sar-e-manzil-e-guman
qadmon ke kuchh nishan hain aage baḌhe hue
ghera hua hai charon taraf se zamin ko
had se ye asman hain aage baḌhe hue
ḳhud chal ke aa gaya hai nishana qarib-tar
hairat se did-ban hain aage baḌhe hue
pichhe kaman-dar pareshan hai bahut
palTan ke kuchh javan hain aage baḌhe hue
aaya huun doston se mulaqat ke liye
kyon tiir aur kaman hain aage baḌhe hue
aata nahin shikar shikari ke samne
jangal se kuchh machan hain aage baḌhe hue
miTTi ke sab zuruf hain pichhe rakhe hue
shishe ke martaban hain aage baḌhe hue
Leave a Reply