Dilawar Ali Aazar
kab tak phirunga haath men kaasa uTha ke main
ji chahta hai bhaag luun duniya uTha ke main
hoti hai niind men kahin tashkil-e-ḳhadd-o-ḳhal
uThta huun apne ḳhvab ka chehra uTha ke main
ba.ad az sada-e-kun hui taqsim-e-hast-o-bud
phirta tha ka.enat akela uTha ke main
kyunkar na sahl ho mujhe rah-e-dayar-e-ishq
laaya huun dasht-e-najd ka naqsha uTha ke main
baḌhne laga tha nashsha-e-taḳhliq-e-ab o ḳhaak
vo chaak uTha ke chal diya kuuza uTha ke main
hai sa.at-e-visal ke malne pe munhasir
kas samt bhagta huun ye lamha uTha ke main
qurbat-pasand dil ki tabi.at men tha tazad
ḳhush ho raha huun hijr ka sadma uTha main
ab mujh ko ehtimam se kiije supurd-e-ḳhak
ukta chuka huun jism ka malba uTha ke main
achchha bhala to tha tan-e-tanha jahan men
pachhta raha huun ḳhalq ka beḌa uTha ke main
‘azar’ mujhe madine se hijrat ka hukm tha
sahra men le ke aa gaya ḳhema uTha ke main
Leave a Reply