Arshad Abdul Hamid
ḳhamosh jada-e-inkar bhi hai sahra bhi
aza men pa-e-junun baar bhi hai sahra bhi
kahin bhi jaa.en lahu ko to sirf hona hai
ki tishna kucha-e-dildar bhi hai sahra bhi
mata-e-zist ḳhariden ki teri samt baḌhen
hamare samne bazar bhi hai sahra bhi
mujhe to saari hadon se gurez karna hai
mira harif to ghar-bar bhi hai sahra bhi
yahin ye dhuul yahin ḳhushbuen bhi uḌti hain
ye dil ki ḳhitta-e-gulzar bhi hai sahra bhi
na chhoḌta hai na zanjir kar ke rakhta hai
tira ḳhayal ki divar bhi hai sahra bhi
ye kya jagah hai jahan donon vaqt milte hain
yahan daraḳht samar-bar bhi hai sahra bhi
zara si chuuk se pansa palaT bhi sakta hai
ki aql shahr-e-fusun-kar bhi hai sahra bhi
Leave a Reply