Hidayatullah Khan Shamsi
bahut kaThin hai Dagar thoḌi duur saath chalo
na.i hai rahguzar thoḌi duur saath chalo
hayat bikhri hui hai sameT lene do
main si luun chak-e-jigar thoḌi duur saath chalo
abhi to duur hai manzil udaas raste hain
abhi na phero nazar thoḌi duur saath chalo
ḳhumar-e-ishq hai baaqi rag-e-shikasta men
nasha ye jaa.e utar thoḌi duur saath chalo
na aarzu na koi hausla na manzil hai
tumhi ho zauq-e-safar thoḌi duur saath chalo
siyah raat musallat hai dil ki duniya par
mata-e-nur-e-sahar thoḌi duur saath chalo
na jaane Dor ye sanson ki TuuT jaa.e kab
kise hai us ki ḳhabar thoḌi duur saath chalo
tamam umr mira saath de na paoge
abhi to yaar magar thoḌi duur saath chalo
Leave a Reply