Ek Tamanna Aisi Jo Darkar Nahin

Sabahat Urooj

ek tamanna aisi jo darkar nahin

ek paheli hai jo pur-asrar nahin

kahin pe ghar ḳhali hai koi log nahin

kahin pe log bahut hain par divar nahin

tera us ko chhoḌ ke jiina aisa hai

ek kahani puuri hai kirdar nahin

milne ki ummid kahin par rakkhi hai

bojh kisi ke hijr ka hai jo baar nahin

ek suhulat hasil ho jaa.e mujh ko

us ki ḳhatir lekin main tayyar nahin

bhaav nahin malum ki kis ka kitna hai

main be-mol to huun lekin be-kar nahin

ham-ahang bhi hote hain par duniya men

tere mere jaisi kuchh takrar nahin

kam hai lekin achchha ḳhasa likkha hai

sher ka matlab sher hai ab ambar nahin