na laga le ga.e jahan dil ko
aah le ja.iye kahan dil ko
mujh se le to chale ho dekho par
toḌiyo mat kahin miyan dil ko
aazma aur jis men chahe tu
sabr men kar na imtihan dil ko
yuun to kya baat hai tiri lekin
vo na nikla jo tha guman dil ko
rakh na tu ab daregh nim-nigah
maar mat dekh nim-jan dil ko
aah kya kiije yaan banaya hai
dil-girafta hi ghuncha saan dil ko
mar gaya pis gaya na ki par aah
afrin aise be-zaban dil ko
dushmani tu hi is se karta hai
dost rakhta hai ik jahan dil ko
mehrbani to ki na zahir men
rakhiye baare tu mehrban dil ko
lijiyega na lijiyega phir
dekhiye to sahi butan dil ko
azmana kahin na saḳhti se
dekhiyo mere na-tavan dil ko
tu bhi ji men use jagah diijo
manzilat thi ‘asar’ ke haan dil ko
Leave a Reply