vahshat ka kahin asar nahin hai
kuchh bhi hai ye mera ghar nahin hai
ta-hadd-e-falak khinchi hai divar
divar men koi dar nahin hai
aghaz-e-safar men qafila tha
ab ek bhi ham-safar nahin hai
kuufa ho damishq ho madina
sadat ka koi ghar nahin hai
vo, vo to nahin jo samne tha
mera hai, mira magar nahin hai
is ahd ki shanaḳht Thahri
sab kuchh hai magar nazar nahin hai
jiine ki talab nahin hai ‘shohrat’
jiine se magar mafar nahin hai
Leave a Reply