tasvir-e-zulf-o-ariz-e-gulfam le gaya
murghan-e-quds ke liye gul-dam le gaya
duniya se dagh-e-zulf-e-siyah-fam le gaya
main gor men charagh sar-e-sham le gaya
ki tark main ne shaikh-o-barahman ki pairvi
dair-o-haram men mujh ko tira naam le gaya
kya kya dikhai sair-e-safed-o-siyah-e-dahr
kis kis taraf ko ablaq-e-ayyam le gaya
eajaz main ne rajat-e-khurshid ka kiya
bala-e-bam us ko sar-e-sham le gaya
bhatke phire do amla-e-dair-o-haram men ham
is samt kufr us taraf islam le gaya
chehle ke gul chadhae koi meri qabr par
main arzu-e-vasl-e-gul-andam le gaya
pistan-e-nau-damida ne malvae khuub haath
main dagh-e-hasrat-e-samar-e-kham le gaya
didar dostan-e-vatan ka dikha diya
mujh ko adam men ablaq-e-ayyam le gaya
pahna kafan to kucha-e-qatil main paai raah
kaabe men mujh ko jama-e-ehram le gaya
rah-e-adam men sair-e-charaghan nazar padi
turbat men dagh-e-gham dil-e-nakam le gaya
dozakh men jal gaya kabhi jannat men khush raha
mar kar bhi saath gardish-e-ayyam le gaya
nafrat hui do-rangi-e-lail-o-nahar se
main subh-o-sham us ko lab-e-bam le gaya
zer-e-zamin ghurub hua aftab aaj
turbat men daagh bada-e-gulfam le gaya
tir-e-sitam se mil ke uda janib-e-adam
par aap ke khadang se main daam le gaya
main justuju-e-kufr men pahuncha khuda ke paas
kaabe tak un buton ka mujhe naam le gaya
saaqi ke paas vusat-e-mashrab ne raah di
main kasa-e-falak evaz-e-jam le gaya
kuchh lutf ishq ka na mila jite-ji ‘munir’
nahaq ka ranj muft ka ilzam le gaya